Friends.pngキャプチャ.PNG小編記得初到日本嘅時候，除左公司嘅同事之外基本上係完全沒朋友，😢(so sad)
但其實當你開始有第一個朋友之後就可能會有之後無限個朋友!!
大家可能都係初到日本生活，或者係日本已經係你第二個家鄉回鄉是必須的都好，無論點樣就算你有幾愛日本呢片土地，去邊度玩邊度食有幾熟都好，但如果都係同呢度嘅人無聯繫的話其實多少都會有種遺憾，作為一個人無論有多自閉其實都會想有同人溝通嘅時候，但如果人在日本想搵人傾下計又人都唔識多個其實都幾SAD，所以點解唔識返個日本朋友??
對小編呢種小毒毒黎講，如果你問我識日本朋友難唔難，我會答你其實係算難，但有方法的話毒毒的我可以，你一定更加可以!!
日本人有幾排外其實大家可能都知道，而排外呢一點就正正係令外國人難以結識日本朋友嘅其中一個原因，你可能又會問咁我天生唔係日本人嘛，咁點搞喎。方法就係令你自己成為唔再係外人嘅”內人”。但其實日本人都會排”內”不過今次就唔講太多住啦😂
以下同大家分享小小心得，希望可以幫到大家溶入日本社會，但頭盔先要戴戴，以下經驗可能只套用在本人身上，全部未經證實係咪對全部人都有效，不過大家可以參考一下:
外表方面: 樣係天生冇得搞，但如果你咁岩好在同小編一樣生得同日本人比較似的話，當唔講太多日文既時間，日本人其實好難係你口音同字裡行間知道你係唔係日本人，呢一點其實對唔熟既朋友或者當你出街玩同買野嘅時候可以避免一D不必要嘅麻煩。有時候唔講太多非必要嘅野就可以好好咁隱藏自己!
衣著方面可以參考下其他日本人或者買一D時裝書睇下，但如果你同小編一樣都係對打扮冇咩概念的話其實簡單素色嘅大牌子係一個唔錯嘅選擇。
語言方面: 好多朋友都講日文要講到native其實冇可能，流利都唔錯啦，口音冇咩用架!!雖然如果一口流利日文對日本人黎講通常都好欣賞你呢個外國人架啦。但事實係如果你能夠將口音練到native嘅程度絕對大大加分好感度up，識想想有一個白人同你講native嘅廣東話??就係呢種感覺啦(btw小編人生中只有一個白人朋友可以講到native嘅廣東話，我覺得佢真係巧勁勁!!)。
口音要好其實只要不斷練習，其中一個方法就係搵一個你嘅日劇偶像(同自己相同性別比較好，你都唔想自己學到變左個”男女子”或者女漢子掛🤣)，不斷loop不斷聽，留意每一個小細節例如語氣，語速，高低音等等，然後再去模仿，不斷講(最好可以録低自己嘅聲聽返有咩問題)就可以不斷進步。
內在方面: 相比起其他民族，日本人更加講求民族性，所以要溶入日本人嘅生活就要去了解下日本人嘅生活習慣，係適當嘅日子去倒適當嘅垃圾，扶手梯要企返岩果邊留返條唔比人行呢D基本野固然係必須的。最重要係明白日本人嘅理念係盡量”唔為身邊嘅人帶黎麻煩”，當抱住呢個心態去細心了解日本人嘅習慣嘅時候，其實好多野就會理解點解要咁樣做。
同埋日本人會講”空気読め”，意思係”讀空氣”，實際就係講能夠因應同理解當時現場氣氛而作出適當反應同行動，要明白日本人好多野都未必會講出口，佢地會覺得應該係人人都知道人人都咁樣做嘅野點解你會唔知，唔做或者做多左同做錯就係異類，佢地嬲左你又唔會同你講，當時人可能根本唔知問題發生在係邊!有D外國朋友就會覺得日本人好難理解，無端端做咩嬲左我?!其實就係咁解。所以要同日本人好好相處，養成能夠讀空氣嘅能力再作出符合日本人理解範圍內嘅反應是需要的。
實踐編: 睇左咁多又係時候到實際行動，3唔識7要就咁去識日本人其實好難，就算有時坐電車有D女仔可能對你有D好感故意企係你附近嘅時候都唔好開心住，(雖然日本女仔比起香港女仔主動，但電車始終都係事非之地，一個唔覺意比人當係電車痴漢就唔係幾好啦!)
除左最傳統係網上識朋友之外，(小編未試過，亦覺得網上更難識到人，有經驗嘅朋友仔可以分享一下。)係日本最方便識朋友嘅方法就係搵一D圈子入，當你地係同一個圈子入面，日本人相對就冇咁易當你係外人，可以搵一D自己嘅興趣，例如FANS CLUB或者去學下野，空手道又好弓道又好煮野食又好，大家一齊玩同一樣野多D交流就比較容易FRIEND到。記得小編係日本返教會初期坐左幾個星期都冇人理，但當入左小組之後識左第一班朋友之後朋友又會介紹你比其他朋友，圈子就會擴大得好快。如果你冇信仰就去搵一樣自己鐘意嘅野做啦。當你有左第一班朋友之後社交圈子就會可以係幾何級數擴張。
不過結交朋友其實最重要係用心付出，無論咩國藉嘅人都好，當你真心對待佢嘅時候對方一定會感受到你要傳遞嘅溫暖架!!當然都要小心自己唔好比人呃啦!!😂
希望你都可以快D適應係日本嘅新生活，世界上冇一處地方係完美，總會有好有唔好，但概然選擇係一個新地方開始新生活，點解唔放低舊有觀念同心態，去迎接新生活!!
以下開放留言，能力所及小編都會盡力回答，有經驗嘅朋友仔都歡迎分享經驗幫下其他新朋友😉